Xanthe Hancox
Daar het 'n man uit Baäl-Salisa aangekom wat vir die man van God brood gebring het, twintig garsbrode gebak met meel van die nuwe oes, en ook vars koringare. Elisa het gesê: “Gee dit vir die mense om te eet. Maar sy slaaf het beswaar gemaak: “Hoe kan ek die bietjie kos aan 'n honderd man voorsit?” Maar Elisa het weer gesê: “Gee dit vir die mense om te eet, want so sê die Here: Hulle sal eet en nog oorhou.” 2 Konings 4:42-43
Dit is maklik om raak te sien hoe die karakter en werke van Elisa vergelyk kan word met baie van die kenmerke van Jesus se bediening op aarde. In vandag se vers lees ons die verhaal van die man uit Baäl-Salisa en dit is feitlik onmoontlik om die ooreenkoms met die verhaal waar Jesus die 5 000 mense gevoed het, mis te kyk. Net soos die dissipels uit die verhaal van die voeding van die 5 000 moes leer dat God voorsien, moes die profete wat aan Elisa se voete gesit het, leer om God te vertrou.
Die Here het aan hierdie mans die opdrag gegee om sy Woord te verkondig aan 'n volk wat afgode aanbid, en dit sou nie maklik wees nie. Hulle sou persoonlike probleme, vervolging en tye van swaarkry beleef, waarmee slegs God hulle kon help. In hierdie teks word hulle geleer om in God te glo en Hom vir al hulle behoeftes en verantwoordelikhede te vertrou.
Elisa was 'n reddingswerker wat God gebruik het om skadelike situasies te verander en tye van groot nood in tye van oorvloed te verander. Hy kon verby en deur die onmiddellike ellende kyk en dit wat die Here beplan het, raaksien. Sy profetiese bediening is aangevuur deur geloof in God se plan.
Vir watter behoeftes moet ons die Here vandag vertrou? Daar is die fisiese behoeftes – gesondheid, kos, 'n dak oor ons kop – en ook vir ons behoefte om in geloof en gehoorsaamheid te groei. Ons benodig geestelike onderskeiding, leiding en wysheid.
Ons is miskien nie profete soos Elisa nie, maar ons werk is dieselfde: om te getuig van die hoop wat ons het en om getuies te wees van daardie hoop teenoor diegene wat dit nie het nie.
Gebed: God van hoop en van 'n nuwe begin, dankie vir u plan vir ons, 'n plan van hoop en 'n toekoms. Versterk asseblief die hoop in ons. Amen