As Christus in jou hart woon beteken dit dat Hy jou bron van krag is. As jy dan so by die regte kragbron van geloof ingeprop is moet ander mense die verskil in jou lewe kan sien. Hulle moet die teenwoordigheid van Christus in jou lewe kan aanvoel.

 

As jy in die liefde gewortel en gegrondves is, anker dit jou stewig en kan geen storm jou ontwortel nie. En in hierdie onvolmaakte wêreld word ons as gelowiges dikwels deur storms geteister. 'n Sterk wind kan jou finansies heeltemal deurmekaar waai, 'n harde bui reën mag die liefde uit jou huwelik wegspoel en 'n weerligstraal mag binne 'n oomblik jou gesondheid wegneem.

 

Soos 'n boom sal jy net in 'n storm bly staan as jy 'n stewige wortelstelsel het. Dit is wat jou geloof vir jou moet wees. Deur die wind en die reën en die weerligstrale heen moet jy kan vashou aan jou geloof. Geloof wat allesomvattend moet wees. Dit moet geen aspek van jou lewe uitsluit nie, want Christus se liefde is allesomvattend. Dis wyd en ver en hoog en diep. Sonder enige beperkinge. Dit omvou jou heeltemal en beskerm jou teen die storms van die lewe. Met hierdie liefde oral om jou en die geloof in jou hart, kan jy enige krisis te bowe kom.

 

Mag Christus in my hart kom woon

sodat elkeen wat na my kyk

sal weet hoe ver geloof kan reik

sodat elkeen wat my lewe raak

die verskil sal voel

wat liefde maak.