As God sterf huil die skepping

Johann Symington

Kyk die mens – verraai deur ʼn vriend, gevang soos ʼn dief en voor die hof gesleep soos ʼn gewone misdadiger.

Kyk die mens – verlaat deur dié op wie Hy sy hart gesit het.

Kyk die mens – gespot deur die skare, gespoeg deur sy mense, geklap deur soldate. Kyk die mens – van bakboord na stuurboord gestuur deur elke jan rap en sy maat.

Kyk die mens – vasgebind tusen twee pale, geslaan met ʼn gesel, gekroon met dorings.

Kyk die mens – steier onder die gewig van ʼn kruis, kaal uitgetrek en sy kleed in stukke geskeur.

Kyk die mens – vasgespyker aan ʼn kruis, wat opgelig en in ʼn gat in gestamp is waar Hy ondraaglike pyn moes verduur.

Kyk die mens – hang vir sewe ure tussen twee misdadigers, tussen hemel en aarde, deur God en mens verlaat – so besmet deur sonde dat niemand – selfs nie eens God – na Hom wou kyk nie.

Vir wie? Vir my en jou.

Dalk wil jy op die vooraand van Goeie Vrydag die volgende skrifgedeeltes gaan lees:

“Vader vergeef hulle, want hulle weet nie wat hulle doen nie!” Luk 23:34

“Vandag sal jy saam met My in die paradys wees.” Luk 23:43

“Daar is u seun” en “Daar is jou moeder.” Joh 19:26-27

“My God, my God, waarom het U My verlaat?” Matt 27:46

“Ek is dors.” Joh 19:28

“Dit is volbring.” Joh 19:30

“Vader, in U hande gee Ek my gees oor.” Luk 23:46

Jesus, u lyding was onbeskryflik groot, maar u liefde was groter. U het dit verdra ter wille van my. Dankie Here.