---

Op ’n dag het ’n koning besluit om saam met sy amptenare sy boeke na te gaan om te bepaal hoeveel uitstaande skuld hy het. Geskok het hulle ontdek dat een van sy amptenare in sy ryk hom etlike miljoene rande geskuld het. De koning het onmiddellik die opdrag gegee dat daardie amptenaar saam met sy vrou en kinders en al sy besittings verkoop moes word sodat sy uitstaande skuld ingevorder kon word.

In trane het die geboeide amptenaar voor die koning op sy knieë neergeval en gesoebat: “O grote koning, gee my asseblief tog net uitstel! Ek sal aan u alles terugbetaal. Asseblief, moet net nie my gesin van my af wegneem nie!” Die koning het die amptenaar jammer gekry en besluit om sy skuld af te skryf. Die boeie is van die amptenaar se enkels en gewrigte afgehaal en hy was vry om huis toe te gaan.

Net toe die amptenaar die paleis verlaat het hy egter in ’n man vasgeloop wat hom slegs ’n paar honderd rand geskuld het. Onmiddellik het hy die amptenaar die ander man aan die kraag gegryp en hom begin wurg terwyl hy met ’n skeltong na hom gefluister het: “Jy skuld my geld! Waar is dit?” Toe die man nou voor die amptenaar op sy knieë neerval en smeek vir uitstel, het die amptenaar hom sonder genade aangekyk en beveel dat hy onmiddellik in die tronk gestop moes word.

Die nuus het gou by die koning uitgekom en wit van woede het hy die amptenaar ontbied. Met die amptenaar se intrapslag in die paleis het die koning reeds begin skel: “Jou skurk! Ek het miljoene rande se uitstaande skuld vir jou afgeskryf. En wat maak jy met die man wat jou geld skuld?!” In sy woede het die koning hierdie amptenaar oorgegee om gemartel te word totdat hy al sy geld kon terugbetaal.

Deur Jesus Christus se kruisdood kan ons vandag met vrymoedigheid na God se troon gaan met die wete dat as ons, ons sondes (met ’n opregte hart) bely, Hy ons sal vergewe – net soos die koning die amptenaar vergewe het.

Nou is my vraag: Vergewe jy ook daardie ouer, kollega of kennis in jou lewe teenoor wie jy steeds ’n wrok koester?