deur Hennie Symington

Teen die een muur van my kantoor het ek die volgende woorde opgeplak: “Laat jou ‘ja’ jou ‘ja’ wees, en jou ‘nee’ jou ‘nee’ wees” omdat ek, soos meeste van ons weet my  ‘ja’ is nie altyd my ‘ja’ nie en my ‘nee’ is dikwels sommer net doodgewoon dubbelsinnig.

In ʼn wêreld wat lyk of dit nie eintlik meer kop of stert maak uit wat reg of verkeerd is nie, is dit meestal ʼn geval van laat “godswatermaaroor-godsakkerloop”. Die vraag is: hoe passievol is jy? Waar trek jy die streep? Hoe oordeel jy diegene wie se waardes lynreg van joune verskil? Waar staan jy wanneer ʼn streep getrek moet word? Wanneer is jou nee ʼn besliste nee en jou ja ʼn dawerende ja?

Jesus het ʼn absolute passie gehad vir die mensdom. Hy het ʼn baie duidelike streep getrek oral waar mense seerkry en ly onder onmenslikheid, onsensitiwiteit, vooroordeel, arrogansie, skynheiligheid, haat en korrupsie. Hy trek  ʼn streep deur gebruike en tradisies wat mense verslaaf. En van toeka tot nou en tot in ewigheid trek Hy  passievol die streep waar die mensdom met sy sondige natuur oor die tou trap.

So laat jou ja jou ja wees, en jou nee jou nee. In Openbaring 3 waarsku Johannes die mense van Laodisea om nie louwarm te wees nie want dis dieselfde as om doodgoed of goed dood te wees. So maak jy geen hond haar af in die stryd tussen goed en kwaad nie.