Vandag se mense is behep met tyd. Ons hardloop rond met ons een oog op die horlosie en die ander op ons taaklysie. Soos die malhaas met die hoed op in Alice in Wonderland jaag ons ons malle verstand af na wie weet wat. “Moenie my tyd mors nie!” of “tyd is kosbaar” is deel van ons daaglikse woordskat. Ons meet mense selfs in “man-ure”.

Ons verbeel ons tyd behoort aan ons. Ons sal besluit wanneer en vir hoe lank. Die fabriekswerker word gereguleer deur die sirene terwyl die wekker ons almal se baas is. Die ironie is dat tyd ʼn kosbare geskenk uit die hand van God is wat aan ʼn dun draadjie hang wat enige tyd geknip kan word. Dis reg dat ons ʼn dringendheid oor tyd ervaar want tyd kan nie uitgekoop word nie. Dit vraag is net: waaraan spandeer ons ons tyd.

Tydsbesteding kry eers sin as dit ooreenstem met jou waardes. As jy dit wat vir jou belangrik is voorrang laat geniet, en jy jou tyd dienooreenkomstig beplan, sal jy minder konflik oor tyd ervaar. Die Psalmdigter rig ʼn tydige versoek namens ons wanneer hy vra: Leer ons ons dae so gebruik dat ons wysheid bekom (Ps.90:12).

Jy kan nie die verlede verander nie. Niks keer jou egter om jou tyd van vandag af beter te bestuur nie