Jesus wou na 'n stil plek gaan om alleen te wees, maar die mense het Hom gevolg. Weer eens bevind hy hom tussen die mense. Hy stuur hulle nie weg en verduidelik dat Hy alleen wil wees nie. Nee, Hy kry hulle jammer en maak siekes gesond. Hy sien die nood en reageer daarop.

 

Wanneer dit laat word, stel die dissipels voor dat Jesus die mense wegstuur om te gaan kos koop in die dorpe. Jesus sê dat die dissipels vir hulle iets moet gee om te eet. Daar was egter net vyf brode en twee visse beskikbaar en dit is hier waar die wonderwerk van die vermeerdering van die vis en brood plaasvind. Die skare word gevoed en twaalf mandjies vol brood bly oor.

 

Jesus sien behoeftes raak. Nie net groot en dringende behoeftes nie, maar ook kleiner en alledaagse behoeftes. Mense is gesond gemaak, maar daar was ook die doodgewone behoefte aan kos.

 

Hy sien ook daagliks ons groot en klein behoeftes raak. Soms is ons nie eens bewus van hoe daar vir ons voorsien word nie – 'n groen verkeerslig wanneer ons haastig is, 'n parkeerplek wanneer ons dit die nodigste het of sommer net 'n vertroostende woord van 'n vriend of vriendin.

 

As ons al hierdie dinge minder as vanselfsprekend aanvaar, mag ons moontlik 'n nuwe ingesteldheid kweek en met ander oë na mense om ons se behoeftes kyk. Dan kan ons dalk ook met 'n klein bedagsame gebaar iemand anders se dag beter maak.

 

Gebed: Hemelse Vader, baie dankie dat U elke dag in al my behoeftes voorsien. Open my oë dat ek ook ander mense se behoeftes sal raaksien sodat ek ook iets vir iemand anders kan doen om hulle dag beter te maak. Amen